Te Mihinga Komene

Neke atu i te 25 tau kua whakaako a Te Mihinga i te reo Māori me ngōna tikanga, kōhungahunga mai, pakeke mai, puta i ngā tūmomo akomanga katoa. Hei tāna, “Ko tōku reo tōku oranga.” Kātahi anō ia ka wehe i tōna tūranga hei Pou Ārahi i academyEX ki te whai i tana tohu kairangi. I reira, i whakangungua e ia ngōna hoamahi me ngāna ākonga ki ngā tini āhuatanga o tōna ao Māori, arā, ko te reo Māori, tikanga, karakia, waiata, ngā āhuatanga o te Kaupapa Māori, hautūtanga Māori, mātauranga Māori me te whakaako i te tauira Māori i te kura. Nāna hoki i kōkiri Te Ara Kōtihi, te rautaki ako o te kamupene whānui. He kaiārahi hoki ia mō ngā ākonga tohu paerua Māori. Nō mua mai, he kaihuawaere a Te Mihinga i Tātai Aho Rau, CORE Education. Nō konā, i huakina ai te tatau ki ngā rawenga o te hangarau matihiko. He whakangungu kaiako kura Māori te mahi kia taea e rātou te whakaako mā ngā pūrere matihiko hou. I tīmata hoki a Te Mihinga ki te whakamāori i ngā kupu hangarau matihiko hou kia toitū tonu te reo i ngā kura. Ko te tārai rauemi ako mō ngā kura Māori hoki tana mahi i reira. I ākona e ia ngā pūkenga whakaputa rauemi nōna i Huia Publishers hei ringa tārai rauemi. Hāunga atu, ko ngāna mahi ngaio i roto i ngā tau, he kaiwhakaari, he kaipapāho, he kaiwhakamāori, he kaituhi, he kaiarotake hōtaka, he kaiwhakamahere rautaki reo mō Kotahi Mano Kāika anō hoki.